ಆಯ್ತಾರ್ 2025 ಜನೆರ್ 05, ಸಾಂಜೆರ್ 6.30 ವೊರಾರ್ ಕಲಾಂಗಣಾಂತ್ ಕೊಂಕ್ಣಿ ಮಾಳಾಚೊ ಆನ್ಯೆಕ್ ದಾಖ್ಲೊ ಘಡ್ತಾ. ಅಪ್ರತಿಮ್ ಕಲಾಕಾರ್ ನಸಿರುದ್ದೀನ್ ಶ್ಹಾ-ನ್ ಉಗ್ತಾಯಿಲ್ಲ್ಯಾ, ಕೊಂಕ್ಣೆಚೊ ಪಯ್ಲೊ ಆನಿ ಎದೊಳ್ ಪರ್ಯಾಂತ್ಲೊ ಏಕ್ ಮಾತ್ರ್ ಗಿನ್ನೆಸ್ ದಾಖ್ಲೊ ಘಡ್ಲಲ್ಯಾ, ಉದೆಂತಿ ಥಾವ್ನ್ ಅಸ್ತಮ್ತೆ ಪರ್ಯಾಂತ್ಲ್ಯಾ ಸಾದರ್ ಕಲೆಂಕ್ ಆನಿ ಕೊಂಕ್ಣಿ ಕಲಾಕಾರಾಂಕ್ ವೆದಿ ಜಾಲ್ಲ್ಯಾ, ಗ್ರೀಕ್ ರಂಗ್ ವಿನ್ಯಾಸ್ ಶೈಲೆಚ್ಯಾ, ನೋರಿನ್ ಆನಿ ರೊನಾಲ್ಡ್ ಮೆಂಡೊನ್ಸಾ ಉಗ್ತ್ಯೆ ರಂಗ್ ಮಾಂಚಿಯೆರ್ ನೋವ್ ವರ್ಸಾಂಚೆಂ ನೆಂಟುಲೆಂ ಸಗ್ಳಿ ಮಾಂಚಿ ಸಾಂಬಾಳ್ತಾ. ಕೊಂಕ್ಣಿ ಕಲೆಕ್ ದೆಣ್ಗಿ ದಿಂವ್ಚಿ ಪರಂಪರಾ ಮುಕಾರುನ್ ವರ್ಚಿ ಆಸ್ ದವರ್ಚೆಂ, ಚವ್ತ್ಯೆ ಕ್ಲಾಶಿಂತ್ ಶಿಕ್ಚೆಂ, ತಾಕೊಡೆಚೆಂ ಆಲನಿ ಲಿಯೊರಾ ಡಿಸೋಜ 277 ವ್ಯೆ ಮ್ಹಯ್ನ್ಯಾಳ್ಯೆ ಮಾಂಚಿಯೆರ್ 9 ಪದಾಂ ಗಾಯ್ತಾ.