ಆತಾಂ ಇಲ್ಲೆಂ ಪಡ್ದ್ಯಾ ಪಾಟ್ಲ್ಯಾನ್ ತಿಳ್ಯಾಂ. ನೋವ್ ವರ್ಸಾಂಚೆಂ ಭುರ್ಗೆಂ ಮ್ಹಣ್ತಾನಾ ಆವಯ್ ಬಾಪಯ್, ಕುಟ್ಮಾಚಿಂ, ಶಿಕೊವ್ಪಿ ತಾಚೆರ್ ಕಿತ್ಲೊ ಪ್ರೆಶರ್ ಘಾಲ್ತಾತ್ ಕೊಣ್ಣಾ! ಹೊ ಪ್ರೆಶರ್, ಆಮಿ ಟಿವಿ ರಿಯಾಲಿಟಿ ಶೋ-ನಿ ಪಳೆಲಾಂ ಮ್ಹಣ್ತಾತ್ ಗೀ? ರಾವಾ, ಆಲನಿಕ್ ಪಳೆಲ್ಯಾರ್ ತಶೆಂ ಭೊಗಾನಾ.

ತಾಚ್ಯಾ ದೊಳ್ಯಾಂಚೊ ಪರ್ಜಳ್, ತಾಚ್ಯೊ ಹಾಸೊ ತುಮ್ಕಾಂ ಸಾತ್ವ್ಯಾ ಸರ್ಗಾಕ್ ಪಾವಯ್ತಿತ್. ತೆಂ ಶಿಕ್ಪಾಂತ್ ಹುಶ್ಯಾರ್. ಆದ್ಲ್ಯಾ ವರ್ಸಾ ತಾಕಾ ಬೆಸ್ಟ್ ಸ್ಟುಡೆಂಟ್ ಆವಾರ್ಡ್ ಮೆಳ್ಳಾಂ. ಘರಾ ಟಿವಿರ್ ಡೊರೆಮೊನ್, ಟೊಮ್ ಎಂಡ್ ಜೆರಿ, ಒಗಿ ಎಂಡ್ ಕೊಕ್ರೊಚ್ ಆನಿ ಹೆರ್ ಕಾರ್ಟೂನಾಂ ಪಳೆತಾ. ಪುಸ್ತಕಾಂ ವಾಚ್ತಾ. ಭಯ್ಣ್ ಅಮೈರಾ ಆನಿ ಭಾವ್ ಅಲೆಕಾ ಸಂಗಿಂ ಖೆಳ್ತಾ, ಪೊಕ್ರಿ ಕರ್ತಾ. ಆಜಿ- ಆಜೊ ಪ್ರೆಸಿಲ್ಲಾ – ಸಿಪ್ರಿಯನ್ ಡಿಸೋಜ ಆನಿ ವೆರೊನಿಕಾ – ವಿಕ್ಟರ್ ಸಲ್ಡಾನ್ಹಾ ಹಾಂಚೆ ಸವೆಂ ಕಾನುನಾಂ ಕಾತರ್ತಾ. ಮ್ಹಣ್ತಾನಾ ತಾಚ್ಯಾ ಭುರ್ಗ್ಯಾಪಣಾಚೊ ತಾಚೊ ಸರ್ವ್ ವೇಳ್ ಖರ್ಚುನ್, ಚಡಿತ್ ಉರುಲ್ಲ್ಯಾ ವೆಳಾಂತ್ ತೆಂ ಆಪ್ಲಿಂ ತಾಲೆಂತಾಂ ಸಾಣ್ಯಾಕ್ ಧರ್ತಾ.

ತಾಣೆಂ ಸಬಾರ್ ವೆದಿಂನಿ, ಜಾಳಿ ಜಾಗ್ಯಾಂನಿ ಪದಾಂ ಮ್ಹಳ್ಯಾಂತ್. ಲಾಕಾಂನಿ ಲೊಕಾಕ್ ತಿಂ ಆಂವಡ್ಲ್ಯಾಂತ್. ತೆಂ ಕಲಾಂಗಣಾಕ್ ಆಯಿಲ್ಲೆಂಯ್ ಎಕಾ ಪದಾ ಮುಖಾಂತ್ರ್. ಮಾಂಡ್ ಸೊಭಾಣಾನ್ ಕಾಡ್ಲಲೆಂ ಬ್ಲೊಕ್ ಬಸ್ಟರ್ ಫಿಲ್ಮ್ ಅಸ್ಮಿತಾಯೆಚೆಂ ಪದ್ `ಮನಾಂ ಮನಾಂ’ ಗಾವ್ನ್ ತಾಣೆಂ ಜಾಳಿ ಜಾಗ್ಯಾರ್ ಘಾಲೆಂ ಆನಿ ತೆಂ ಪದ್ ಆಯ್ಕುನ್ ಕಲಾಂಗಣ್ ಚೇರ್ ಮ್ಯಾನ್ ರೊನಾಲ್ಡ್ ಮೆಂಡೊನ್ಸಾನ್ ತಾಕಾ ದಿಲ್ಲೆಂ ನಗ್ದಿ ಇನಾಮ್ ವರುಂಕ್ ಆಯಿಲ್ಲೆಂ ಬಾಳ್ ಆಲನಿ ಉಪ್ರಾಂತ್ ಮಾಂಡ್ ಸೊಭಾಣ್ ಕುಟ್ಮಾಚೊ ಕಾಯಾಮ್ ಸಾಂದೊ ಜಾಲೆಂ.

ತಾಚೊ ಬಾಪಯ್ ಅಜಯ್ ಗ್ಲೆನ್ ಡಿಸೋಜ ಆದಿಂ ಇವೆಂಟ್ ಮ್ಯಾನೆಜರ್. ರಿಯಲ್ ಎಸ್ಟೇಟ್ ವಾವ್ರಾಡಿ. ಆಜೊ ಸಿಪ್ರಿಯಾಮ್ ಕೊಂಕ್ಣಿ ಪತ್ರಾಂ, ಸಾದರ್ ಕಲೆಚ್ಯಾ ವಾವ್ರಾಕ್ ವಿಕ್ರ್ಯಾ ಥಳ್. ಬಿದ್ರ್ಯಾಂತ್ಲ್ಯಾ ತಾಚ್ಯಾ ಆಂಗ್ಡಿ ಕೊಂಕ್ಣಿ ಪತ್ರಾಂ, ನೈಟಾಚ್ಯೊ, ನಾಟಕಾಚ್ಯೊ ಟಿಕೆಟಿ ವಿಕ್ರ್ಯಾಕ್ ದವರ್ತಾಲೊ. ಆಪ್ಲಿ ಕುಮಕ್ ದಿತಾಲೊ. ಸಾಂಗಾತಾ ಭೋವ್ ಅಪುರ್ಬಾಯೆಚೊ ಬ್ರಾಸ್ ಬ್ಯಾಂಡ್ ಖೆಳ್ಗಾಡಿ.

ಆಪ್ಲ್ಯಾ ಧುವೆಚೆಂ ಗಾಯಾನ್ ತಾಲೆಂತ್ ವಳ್ಕೆಕ್ ಯೆತಚ್ ಅಜಯಾನ್ ಆನಿ ತಾಚಿ ಪತಿಣ್ ಲೊಲಿಟಾನ್ ಆಪ್ಲೊ ವೇಳ್ ಧುವೆಚ್ಯಾ ತಾಲೆಂತಾಂಕ್ ದಿಂವ್ಚೊ ನಿರ್ಣಯ್ ಘೆತ್ಲೊ. ಮುಳಾನ್ ಪಾಲಡ್ಕಾಚ್ಯಾ ಲೊಲಿಟಾಕ್ ಗಾಯಾನಾಚಿ ವೋಡ್ ಆಸ್ಲಲಿ, ತೆಂ ಕೊಯರಾಂತ್ ಆಸ್ಲಲೆಂ. ಪೂಣ್ ಕಾಜಾರ್, ಭುರ್ಗಿಂ ಜಾತಚ್ ಚಡಾವತ್ ಬಾಯ್ಲಾಂ ಪರಿಂ ತಾಚೆಂ ತಾಲೆಂತ್ ಯಿ ಮಾಳ್ಯಾಕ್ ಚಡ್ಲೆಂ. ಅಜಯ್ ಮ್ಹಣ್ತಾ “ಅಪುಣ್ ಅಲನಿಕ್ ಖಂಚ್ಯಾಯ್ ಸ್ಪರ್ಧ್ಯಾಕ್ ಧಾಡಿನಾ. ತಾಣೆಂ ರಿಯಾಲಿಟಿ ಶೋಂತ್ಲ್ಯಾ ಬೊಂಬ್ಯಾಪರಿಂ ಜಾಯ್ನಾಯೆ. ಖುಶೆನ್ ಆಪ್ಲೆಂ ತಾಲೆಂತ್ ಫುಲಯ್ಜೆ. ಶಿಕ್ಪಾ ಸವೆಂ ತಾಕಾ ಖಂಚ್ಯಾಂತ್ ಆಸಕ್ತ್ ಆಸಾ, ತಾಂತುಂ ಮುಖಾರ್ ವಚಾಜೆ. ಆಮಿ ತಾಚ್ಯಾ ಆಸಕ್ತೆಕ್ ಧಾಂಕ್ ಮಾತ್ರ್ ಜಾಂವ್ಚೆಂ. ಮ್ಹಿನತೆನ್ ತಾಣೆಂಚ್ ವಯ್ರ್ ಚಡಾಜೆ.’’

ಆಲನಿ ಫುಡೆಂ ಗಾಯಾನ್ ಶೆತಾಂತ್ ಕಶೆಂ ಉರತ್, ಕಿತ್ಲೆಂ ವಯ್ರ್ ಚಡತ್? ತೆಂ ತಾಚ್ಯಾ ಮಿನತೆಚೆರ್ ಆಟಾಪುನ್ ಆಸಾ. ಆತಾಂ ಲೆಕಾಂ ಘಾಲುಂಕ್ ಜಾಯ್ನಾಂತ್. ಪೂಣ್ ಅಸಲ್ಯಾ ಚಿಂತ್ಪಾಚ್ಯಾ ವ್ಹಡಿಲಾಂ ಥಾವ್ನ್ ಖಂಡಿತ್ ಗಾಯಾನ್ ಶೆತಾಕ್ ಬರೆಂ ಆಶೆವ್ಯೆತಾ.

ಜನೆರಾಚ್ಯಾ ಪಯ್ಲ್ಯಾ ಆಯ್ತಾರಾ ಕೊಡ್ಯಾಳಾಂತ್ ದೋನ್ ಸಂಗ್ತಿ ಜಾಯ್ತ್ಯಾ ವರ್ಸಾಂ ಥಾವ್ನ್ ಸಾಂಗಾತಾ ಚಲ್ತಾತ್. ಏಕ್ ಎವ್ಕರಿಸ್ತಿಕ್ ಪುರ್ಶಾಂವ್, ದುಸ್ರಿ ಕಲಾಂಗಣಾಂತ್ಲಿ ಮಾಂಚಿ, ಜಿ ಸಾಡೆ ಸ ವರಾರ್ ಸುರ್ವಾತ್ತಾ. ಅಜಯಾನ್ ಮಿನತ್ ಘಾಲ್ನ್, ಆಪ್ಲೆಂ ಇವೆಂಟ್ ಮ್ಯಾನೆಜ್ ಮೆಂಟಾಚೆಂ ವಿಭಿನ್ನ್ ಚಿಂತಪ್ ಆಟೊವ್ನ್, ಕಾನಾ ಮನಾಂಕ್ ಆನಿ ದೊಳ್ಯಾಂಕ್ ಫೆಸ್ತ್ ಜಶೆಂ ಮಾಂಚಿ ಉಭಿ ಕೆಲ್ಯಾ. ಧುವೆಕ್ `ಶೈನ್’ ಕರೊಂವ್ಚ್ಯಾಕೀ ಕೊಂಕ್ಣಿ ಸಾದರ್ ಕಲಾ ಸಾದರ್ಪಣಾಂತ್ ಯಿ ಪಾಟಿಂ ನಾ ತೆಂ ತಾಕಾ ದಾಕೊಂವ್ಕ್ ಜಾಯ್. ಹಿ ಮಾಂಚಿ ಪಳೆವ್ನ್ ಕೊಂಕ್ಣಿ ಮಾಂಯ್ ಜೆಜುಪರಿಂ ಮ್ಹಣ್ತಲಿ, “ಭುರ್ಗ್ಯಾಂಕ್ ಮ್ಹಜೆಲಾಗಿಂ ಯೇಂವ್ಕ್ ಸೊಡಾ, ಫುಡ್ಲೆಂ ಕೊಂಕ್ಣಿ ರಾಜ್ ತಾಂಚೆಂ.’’ ಮಾಂಡ್ ಸೊಭಾಣಾಚೊ ಧ್ಯೇಯ್ ಯಿ ತೊಚ್ `ಕೊಂಕ್ಣಿ ದಾಯ್ಜ್ ಸುಂರ್ಗಾರುನ್ ಮುಖ್ಲ್ಯೆ ಪಿಳ್ಗೆಕ್ ಹಾತಾಂತರ್ ಕರ್ಚೊ.’

ಎರಿಕ್ ಬಾಬಾಚೆಂ ಬೆಸಾಂವ್, ಮೆವಿಶ್ ಆನಿ ಶಿಲ್ಪಾಚಿ ತರ್ಬೆತಿ, ಬಾಪ್ಪು ವಿಜಯಾಚಿ ಉರ್ಬಾ ಆನಿ ಅಜಯ್ – ಲೊಲಿಟಾಚಿ ಖಳನಾತ್ಲಲಿ ಆನಿ ವೊಳನಾತ್ಲಲಿ ಮಿನತ್ ಅಲನಿಕ್ ನವಾಲಾಂ ಕರುಂಕ್ ಸಕತ್ ದಿತಲಿ ಮ್ಹಣ್ಚ್ಯಾಂತ್ ದುಭಾವ್ ನಾ.

ಎವ್ಕರಿಸ್ತಿಕ್ ಪುರ್ಶಾಂವ್ ಜಾತಚ್ 6 ನಂಬ್ರಾಚಿಂ ಸರ್ವ್ ಬಸ್ಸಾಂ ತುಮ್ಕಾಂ ಸ್ಟೇಟ್ ಬ್ಯಾಂಕಾ ಥಾವ್ನ್ ಕಲಾಂಗಣಾಕ್ ಹಾಡ್ನ್ ಸೊಡ್ತಾತ್. ತುಮ್ಚ್ಯೊಚ್ ಗಾಡಿಯೊ ತರ್ ಸಾಂಗ್ಚೆಂಚ್ ನಾಕಾ, ಬಿಕರ್ನಕಟ್ಟೆಂತ್ಲ್ಯಾನ್ ಭಿತರ್ ಘೆತ್ಲ್ಯಾರ್ ವೆಗಿಂ ಪಾವ್ತಾತ್. ಆನಿ ಆಲನಿನ್ ದಾಖ್ಲೊ ಕರ್ತಾನಾ ತುಮಿ ನಾತ್ಲ್ಯಾರ್ ಕಶೆಂ?

– ವಿತೊರಿ ಕಾರ್ಕಳ್